Folketingimi ilaasortaatitat misissorumavaat

Kalaallit ikinnerussuteqartutut Danmarkimit akuerineqarnissaannik inuit pisinnaatitaaffiinik suliniaqatigiffiup Amnesty Internationalip Kalaallit Nunaanni immikkoortortaqarfiata siulittaasuata Roland Thomsenip piumasaqarnera ippassaq oqaluttuaraarput.

Kalaallit ikinnerussuteqartutut akuerineqarnissaannik kissaateqarneq - tyskit Sønderjyllandimi najugaqartut ikinnerussuteqartutut akuerisaanerat assigalugu pilersitassatut kissaatigineqarpoq.

Kalaallit Danmarkimiittut ullumikkut pisinnaatitaaffeqarnerannit ajunnginnerusunik pisinnaatitaaffeqalernissaannik qulakkerinnissasoq, Roland Thomsen isumaqarpoq.

- Isumassarsiap misissorneqarnissaa pingaaruteqarpoq, IA sinnerlugu folketingimi ilaaasortaq Juliane Henningsen oqarpoq.

Kalaallit Savalimmiormiullu Danmarkimiittut pisinnaatitaaffii Folketingimi Atlantikup avannaani suleqatigiinnit misissuiffineqaleruttorput.

Juliane Henningsen isumaqarpoq, mississuinermi tassani apeqqut ilannguneqarsinnnasoq.

- Pisinnaatitaaffinnik nalunaarsuinermi pingaartipparput inuiattut ikinnerussutilittut pisinnaatitaaffiit paaasiniassallugit qanoq innersut, Juliane Henningsen oqarpoq, eqqarsaatigalugu kalaallit Danmarkimi najugaqartut pisinnaatitaaffiisa misissorneqarnissaat.

Kalaallit Danmarkimi najugaqartut inuiattut ikinnerussuteqartutut akuerineqarnissaat periarfissaanersoq Siumut sinnerlugu folketingimi ilaasortamit Lars-Emil Johansenimit siornatigut mississorneqarsimavoq, isumassarsiarlu maanna tapersersorlugu, erseqqissartariaqarnerarpaa ikinnerussuteqartututut akuerisaaneq qanoq imaqarnersoq mississuiffigineqaqqaartariaqartoq.

Savalimmiormiut folketingimi ilaasortaatitaata Høgni Hoydalip isumassarsiaq soqutigivaa.

-Massakkut takusinnaasakka malillugit misissorneqartariaqarpoq, taannami iluaqutitaqassaaq, kinaassutitsinnik nukittorsaataalluni aammalu kultureqarnitsinnut iluaqutaassaaq, Høgni Hoydal oqarpoq, ilanngullugulu oqaatigaa kalaallit savalimmiormiullu Danmarkimi najugaqartut amerlaqisut nunagisaminut attaveqartarnerat ajornannginnerulissammat, Høgni Hoydal oqarpoq, erseqqissarpaali kalaallit savalimmiormiullu Danmarkimi najugaqartut kisimik pineqassammata.

Taamatut inernilerlugu aaqqiissoqassaapat, Savalimmiormiunut kalaallinullu Danmarkimi najugaqartunut atuunnissaa pineqarpoq, naalagaaffeqatigiinnerup iluani pineqarani, taamaaliortoqassagaluarpammi, nammineq nunagisatsinni ikinnerussuteqartutut naatsorsuunneqalissagatta, Høgni Hoydal oqarpoq.

Tyskit ikinnerussuteqarlutik Sønderjyllandmi najugaqartut kisimik Europap ikinnerussuteqartut pillugit isumaqaatigiissutaannut atuutsinneqarnissaa Danmarkip manna tikillugu aalajangiusimavaa, isumaqatigissummut tassunga Danmark atsiornikuulluni.

Isumaqatigiissutitut nassuiaat taanna Namminersornerullutik Oqartussanit - kingusinnerusukkut Namminersorlutik Oqartussanit - tapersersorneqarpoq.