Fogh: Kalaallit Savalimmiullu piumasaminnik pisinnaapput

Savalimmiormiut sinnerlugit Folketingimi ilaasortaasup aappaa republikaneri Høgni Hoydal isumaqarpoq Danmarki nunasiaateqarniarpalaartumik Savalimmiunut aqutsisoq.

Folketingip ippassaq naggataarutaasumik oqallinnerani Høgni Hoydal oqarpoq danskit nunanut allanut tunngasutigut, illersornissamut inatsiseqarnermullu tunngasutigut Savalimmiormiut qulaatiinnarlugit aalajangiisartut.

Danskit ministeriunerat Anders Fogh Rasmussen akerliliivoq oqarluni danskit politikkertik aalajangiusimagaat.

- Kalaallit savalimmiormiullu piumasatik pisinnaavaat, tamannalu Folketingimi amerlanerussuteqartunit tapersersorneqarpoq, Anders Fogh Rasmussen erseqqissaavoq, isumaqarnerarporli Savalimmiut Danmarkimut pituttorsimanertik nukittorsarpassuk tamanna Savalimmiormiunut pitsaanerpaassasoq.

Ministeriuneq isumaqarpat, tassa kalaallit savalimmiormiullu piumasatik tamaasa pisinnaagaat, taava nammineq sukkanerpaamik angerlassalluni Høgni Hoydal oqarpoq.