Fogh aamma Bendtsen isumaqatigiinniassappat

- Ministeriunerlu marluulluta isumaqatigiissutigisariaqassavarput. Andersilu siusinnerusukkut isumaqatigiissuteqartareerpugut massakkullu aamma isumaqatigiissuteqassaqqaarpugut. Tassami angusinnaanngisavut naapeqatigiiffissarsiortariaqartarpavut. Anders Fogh qinersisitsiniarluni nalunaaruteqarpat aliasuutiginavianngilara, Bendt Bendtsen oqarpoq.

Ministeriuneq Anders Fogh Rasmussen massakkorpiaq Kalaallit Nunaanniippoq sermersuaq takutikkiartorlugu. Danmarkimut uteriaruni kikkut akileraarutitigut oqilisaaffigineqarnissaat pillugu Bendt Bendtsen isumaqatigiinniartussaavaa.

Venstret akissarsiakinnerpaanut akileraarutitigut oqilisaarusupput. Kisianni Konservativit tamanna naammaginngilaat. Akunnattumik akissarsiallit akissarsiaqqortunerpaallu aamma akileraarutitigut oqilisaavigineqartariaqartut Konservativit siulittaasuat isumaqarpoq. Inunnut nalinginnaasunut sulinissaq imminut akilersinnaasariaqarpoq, pisortat avaqqullugit namminersuutigalugu sulineq atugaavallaaqaaq, taamaattumik akissarsiakinnerpaat kisiisa akileraarutitigut oqilisaavigineqarnissaat kisimi naammanngilaq, Bendt Bendtsen oqarpoq.

Partiit siulittaasuisa taakku marluullutik sapaat isumaqatigiinniarfiginiarlugu aalajangiussimavaat qanorlu isumaqatigiissuteqarsimanerat sapaatip akunnerata tulliani tusarfigissajunnarsivarput.