Isikkamik arsaallutik nunanut allanut unammisartut nunat tamalaat aappaagu unammiuarnerini peqataassasut
Kalaallit Nunaanni arnani angutinilu isikkamik arsaallutik nunanut allanut unammisartut, nunat tamalaat 2021-mi unamminerini peqataassapput. Kalaallit Nunaanni Arsaattartut Kattuffiat tusagassiorfinnut taama nalunaarpoq.
Arnani nunanut allanut arsaattartuni illup iluani arsaattartunik futsalertartunik pilersitsisoqassasoq aalajangerneqarpoq. Taakku nunani tamalaani aappaagu anngunniunnissanut peqataanissaat siunertarineqapoq.
Angutit arsaattartut qeqertaaqqat unammiuaaqatigiinneranni Island Gamesimi isikkamik arsaalluni unamminissamut aappaagu peqataassapput, nunallu avannarliit illup iluani isikkamik arsaallutik unamminisaannut aappaagu aamma peqataassallutik.
Qeqertami Guernseyimi Tuluit Nunaata Frankrigillu akornanniittumi aappaagu Island Gamesertoqassaaq.
Arnat nunanut allanut unammisartuisa Island Gamesertoqarnerani arnat isikkamik silami arsaanneranni peqataanissaat Kalaallit Nunaanni Arsaattartut Kattuffiata kissaatigisimagaluarpaa, aningaasaqarnikkulli unamminartoqarnera pissutigalugu Island Gamesimi peqataasussanik pingaarnersiuisoqarpoq. Angutillu nunanut allanut unammisartut peqataanissaat aalajangerneqarpoq.
