FN-ip aalajangersagaa sunniuteqarpallaarnavianngilaq
Naalagaaffiit Peqatigiit nunap inoqqaavisa pisinnaatitaaffiinut isumaqatigiissusiaa – sapaatip akunnerani kingullermi akuersissutigineqartoq – nunatsinnut sunniuteqarpallaarnavianngilaq, Namminersorneq Pillugu Isumalioqatigiissitap allaffeqarfiani immikkoortortami pisortaq Mininnguaq Kleist taama oqarpoq.
- Isumalioqatigiissitap sulineranut immaqa allannguuteqarpallaarnavianngilaq. Tassami isumalioqatigiissitami suliassat amerlanerit naammassereernikuupput. Maanna aningaasaqarnermut tunngasut kiserngorupput. Taamaattumik oqarsinnaavugut FN-ip aalajangersagaa Namminersorneq pillugu isumalioqatigiissitap sulineranut kingusinaalaartoq, Mininnguaq Kleist oqarpoq.
FN-ip aalajangersagaani nunamik piginnittussaaneq pillugu qanoq allassimasoqarpa?
- Marloqiusamik allassimasoqarpoq. Nunap inoqqaavi nunaminnik piginnittunngorsinnaasut allaqqavoq. Kisianni aamma allassimasoqarpoq nunat inoqqaavi naalagaaffimmut attavigisaminnut avissaartinneqarnerat kingunerisinnaanngikkaa, Mininnguaq Kleist oqarpoq.
FN-ip aalajangersagaa siunissami nunatsinni qanoq atorneqarsinnaava?
- Imaassinnaavoq siunissami atorneqalaarsinnaasoq. Namminersoq pillugu inatsisissaq akuerineqassappat, alloriaqqinnissatsinni immaqa imaassinnaavoq atorneqalaarsinnaasoq. Tassa aalajangersakkap naggataani allaqqavoq namminiilivinniarnermut atorneqarsinnaanngitsoq. Tassa aalajangersagaq atorlugu naalagaaffiit nunataat ilanngarterneqarsinnanngillat, Mininnguaq Kleist oqarpoq.
Mininnguaq Kleist aamma erseqqissaavoq - isumaqatigiissusiaq anguneqartoq kusanartuusoq naggueqatitsinnullu Canadamiittunut, Alaskamiittunut Ruslandimiittunullu sunniuteqarluarumaartoq.