FN-imi ilaasortassat oqqassutaapput
Naalagaaffiit Peqatigiit isumannaallisaaniaqatigiivini ilaasortassat pillugit unnuaq sakkortuumik oqqattoqarpoq.
Latinamerikami USA-mik sakkortunerpaamik isornartorsiuisartup – Venezuela-p – Naalagaaffiit Peqatigiit isumannaallisaaniaqatigiivini ilaasortaatitaqalernissani ilungersuutigaa, USA-llu suut tamaasa atorlugit tamanna pinngitsoortinniarsaraa.
Naalagaaffiit Peqatigiit isumannaallisaaniaqatigiivini Latinamerikap ilaasortaatitassaatut ilaasortanngorniuttut tassaapput Venezuela aamma naalagaaffik Amerikami Qiterlermiittoq Guatemala.
Naalagaaffiit Peqatigiit ataatsimeersuarneranni ippassaq unnukkut quleriarluni taasisitsisoqareersorlu kikkut ilaasortaatitaqalissanersut suli nalunarpoq.
Guatemala amerlanerussuteqalaartunit tapersersorneqaraluarpoq, kisianni piumasaqaataavoq nunat ilaasortaasut 192-iusut 2/3-iisa ilaasortanngortussaq tapersersussagaat. Tamassumalu angunissaa Guatemala-mut ajornakusuussaaq.
Venezuelap præsidentiata nunat Afrikamiittut Aasiamiittullu sivisuumik taasisussarsiorluni sunnerniaraluarpai peqatigitillugulu USA-p præsidentianut tunngasunik oqaaseqartarnini sakkortusiartortillugu, tamanna ilaatigut Naalagaaffiit Peqatigiit oqaluttarfiannit qanittukkut pivoq.
- Ippassaq Tiaavulu maaniippoq sulilu manna ikuallassaatisunnippoq, Venezuelap præsidentia Bush pillugu taama oqarpoq. Tamanna Venezuelap ajoqutigiinnarsinnaagaa oqaatigineqarpoq.
Naalagaaffiit Peqatigiit isumannaallisaaniaqatigiivini 15-inik ilaasortaqartuni issiatitaqarneq ataqqinaataavoq, Danmarkilu ukiuni kingullerni arlaqalersuni ilaasortaatitaqarpoq.
Unnuaq USA-p ambassadøria nunanut assigiinngitsunut sunniiniaraluarpoq Guatemala-mik taaseqqullugit, iluatsitsivallaaranili.
Oqaatigineqarpoq ualimut taaseqqittoqassasoq, kisianni aalajangiisoqarnissaa sivitsuuttoorsinnaavoq.
Soorlu 1979-imi Cuba aamma Columbia ilaasortanngorniummata 155-eriarluni taasisoqaraluarmat aalajangiisoqanngitsoorpoq. Taamanikkut taarsiullugu Mexico ilaasortaatitaqalerpoq.
