FN- ataatsimiittartoqatigiivisa Iranip pissaanermik atornerluinera misissuleraat

Naalagaaffiit Peqatigiit inuttut pisinnaatitaaffiit pillugit ataatsimiittartoqatigiivi, Iranip akerliussutsimik takutitsisunut pissusilersuutai pillugit sisamanngornermi ataatsimiikkasuartinneqarput.

Schweizimi illoqarfimmi Genévemi sisamanngornermi ullaap tungaani nalunaaqutaq qulinut ataatsimiittoqarpoq, ataatsimiittartoqatigiinni nunat ilaasortat 47-t Iranimi qaammatini kingullerni marlunni akerliussutsimik takutitsinerpassuit eeqartorlugit.

Iranimi sakkutuut isumannaallisaaniat akerliussutsimik takutitsisunut sakkortuumik pissusilerlutik iliuuseqarneranni inuttut pisinnaatitaaffiit unioqqutinneqarsimanersut misissorneqarnissaa, nunat 47-t akornanni 25-t akuersissutigaat.

Tassungalu atatillugu aalajangersakkamik siunnersuusiortoqarnissaa taasissutigalugu. Nunat 16-it matumani taaseqataanngillat.

Aalajangersakkap akuersissutigineqarnera Amnesty Internationalip oqaluttuarisaanermi pingaarutilittut nalilerpaa.

Naalagaaffiit Peqatigiit inuttut pisinnaatitaaffiit pillugit ataatsiimittartoqatigiivisa qullersaata Volker Türkip ('folker tyrkip'), Østrigimeersup, ataatsimiinnerup ammarneqarnerani Iranimi maanna pissutsit isornartorsiungaatsiarpai:

- Pissaanermik pisariaqanngitsumik unioqqutitsisumillu atuineq piaarnerpaamik unitsinneqartariaqarpoq, Volker Türk oqarpoq, nangillunilu:

- Pissusitoqqat atorneqartut, pissaaneqartullu suut tamaasa atorlugit pissaanermik tigumminninniarnerat atorneqarsinnaanngilluinnarpoq. Inuttut pisinnaatitaaffiit maanna unioqqutinnneqarluinnarput, Türk oqarpoq.