FN akuliuteqquaat
Bangkokimi illutungeriit akersuunneranni sapaatip-akunnerata naanerani pisumi ikinnerpaamik inuit 29-t toqutaapput, allat 220-t sinneqartut ikiligaasut.
Naalakkersuisunut illuatungiliuttut nuimanersaasa Thailandip kunngia aamma akuliuteqquaat.
Bangkokimi pisut sorsunnermut assersuunneqarsinnaasut ilungersunarsilluinnarput. Taamaammat iliuuseqartoqaqqusilerpoq.
- Thailandimi kattuffiit isumaqatigiissitsisinnaanngimmata FN-ip akuliunnissaa kissaatigaarput, illuatungiliuttut siuttui oqarput.
Thailandimi oqartussat ullumimiit ajunaarnersuaqartillugu maleruagassat nunap ilaani tallimani atuutilersippaat.
Peqatigitillugu nalunaarutigaat illuatungiliuttut Naalagaaffiit Peqatigiinnut FN-imut ikioqqullutik saaffiginnissutaat akuersaanngikkitsik.
Oqartussat piumasaraat illuatungiliuttut akerliussutsimik takutitsisut aappaluttunik atisalersorsimasut siuttui tunniutiinnassasut, namminneq Bangkokimi nunallu immikkoortuinilu allani 17-ini killilersuinerit aallartikkamikkit.
Neriorsuipput akerliussutsimik takutitsisut illoqarfiup ilaa tiguarsimasartik qimappassuk, arnat meeqqallu ikiuiniaqatigiiffiup Røde Kors-ip sulisuisa ikiorumaaraat.
- Angutit aamma suneqaratik qimagussinnaassaapput, kisianni aatsaat sakkulersorsimassanngikkunik, sakkutuut oqaaseqartitaat oqarpoq, nutaarsiassaqartitsivik AFP taama allaaserinnippoq.