Naalagaaffiit Peqatigiit: Pinngortitap innarlerneqarnera silap pissusiata allanngoriartorneratulli ajornartorsiutaatigaaq

Pinngortitap innarlerneqarnera, silap pissusiata allanngoriartorneratut nunarsuarmioqatigiinnut ajornartorsiutaatigaaq. Naalagaaffiit Peqatigiit uumassusilinnut tunngasunut suliniaqatigiiffiata qullersaa Robert Watson taama oqarpoq.

Atorfilittat diplomatit nunanit 130-neersut, pinngortitap nalilersorneqarnissaa pillugu Parisimi ataatsimeersuarneranni Watson oqalugiarami taama ilaatigut oqarpoq:

Pinngortitap innarlerneqarnerata iliuuseqarfigineqarnissaanut periarfissat milliartuinnartut, Robert Watsonip oqaatigaa.

Nunarsuarmi inuit pinngortitamik atuipilunnerisa nunarsuarmut sunniutai, nalunaarusiami 44-nik quppernilimmi taakkartorneqarput, pinngortitamit isumalluutit ikiliartornerisa malitsigisaanik iliuuseqarsinnaanissamut periarfissat annikilliartortut oqaatigineqarluni.

Silaannaap mingutsinneqarnera, imermik pilersuinerup ajornarsigaluttuinnarnera, nunaatillu naggorissut ikiliartornerat innersuussutigineqarput:

- Inuup nunarsuup isumalluutaanik atuipilunnera sunniuteqarnerlukkiartuinnarpoq, nalunaarusiami taama ilaatigut inerniliisoqarpoq.

Uumasut naasullu assigiinngitsut 1 millionit pallillugit nunguissinnaanissaat aarleqqutigineqarpoq, ukiut qulikkaani tulliuttuni nunguissinnaanissaasut allaat oqaatigineqarluni. nunarsuup 75 procentiata aarlerinartorsiorfiunera ilaatigut taakkartorneqarpoq.

Aalisakkat pingajorarterutaasa missaat ikiliartupiloorput, sinnerilu aalisapilunneqarlutik, aniguisinnaassusaallu apeqquserneqarluni.

Sullernit assigisaallu ikiliartupiloornerat aamma aarleqqutigineqarpoq, taakkuummatami naasunik pujoralatserisut, pingaartumik igutsaat ikiliartornerat aarleqqutigineqarpoq. Naatitat millionilikkaanik nalillit annaaneqarnerannik tamanna kinguneqarsinanavoq.

Uumasussillit sapinngisamik amerlasuujunissaat pillugu Naalagaaffiit Peqatigiit 2010-mi nalunaarutaasa akornanni immikkoortut 20-t eqquutsinneqarsimanngillat, soorlu nunat eqqissisimatitat illersorneqarnissaannut tunngasut, orpippassuit sapinngisamik annikilliartunnginnissaannut suliniutit, uumassusillillu illersorniarlugit mingutsitsinnginnerunissamik suliniutit annerusumik eqquutsinneqarsimanatik.