Qilalukkanik qernertanik pisassiissutit ilaneqarnissaannik piumasaqartut
Avannaani qilalukkanik qernertanik pisasseeqqittoqarnissaa, Inatsisartuni partiit amerlanerussuteqaqqalaartut piumasaaraat.
Siumut, Partii Naleraq, Atassut Nunattalu Qitornaasa Inatsisartunit ilaasortaatitaat, katillutik 16-iusut, qernertanik pisassaaruttunut pisasseeqqittoqarnissaa, naalakkersuisunut ammasumik allagaqaateqarnermikkut piumasaraat:
Piniartut sumiiffinni pineqartuni inuussutissarsiornerat pisassiissutit nungussimanerat pissutigalugu kipiluttunarsisimasoq, partiit naalakkersuisunut allagaqaateqartut innersuussutigaat:
- Piniarnerup saniatigut periarfissaqanngimmat inuussutissarsiuteqanngillat imaluunniit oqarluannarluni piniartuunerup saniatigut isertitassaqarpianngilaq, piniartullu ilaqutariit allat assigalugit pilersuisuupput akiligassaqarlutillu, partiit sisamat taakku ilaatigut allapput.
Qernertanik qilalugartassiissutit ilaneqarnissaat piumasaralugu Qaanaami piniartut akerliussutsimik ukioq manna aggustip naalernerani takutitsipput, tamaanimi qernertanik qilalugartassiissutit 144-t nungussimammata.
