Innuttaasut 668-it siorna 2019-imi katsorsartipput ukiup sulianut sanilliullugu amerlariarlutik

- Tamanna ineriartorneruvoq ajunngitsoq. Innuttaasut taama amerlatigisut ajornartorsiuteqarnertik takusinnaallugu katsorsartikkusullutik saaffiginnittarnerat sapiissuseqarneruvoq, ikiorneqarnissamik qujarussisut  katsorsartittartut assut ataqqivagut,” Allorfimmi pisortaq, nakorsaq Birgit Niclasen  taama oqarpoq .

2019-mi katorsartinniarlutik nalunaarsimasut amerlanerpaartaat  25-it 34-illu  akornanni ukioqarput, arnat angutinit amerlanerulaaarlutik.

Katsorsarneqarnissamik innersuunneqartut tallimaagaangata sisamat tassa 73 procentit annertuumik imigassamik ajornartorsiuteqartarput.

Ikiaroornatumik hashimik atornerluisut saaffiginnittartut aamma amerlapput.

Pingaartumik angutini inuusuttuni  hashimik atornerluineq ajornartorsiutaavoq -
Pinngitsuuisinnaajunnaarnermik katsorsartittartut affangajaat angutit 44 procentii hash-imik pinngitsuuisinnaajunnaarnermik ajornartorsiuteqarput.

Allorfimmi katsorsartittut amerlanerit naammassinnipput.
Katsorsartittut tallimaagaangata sisamat 2019-imi katsorsartinnerminnik naammassinnipput, ukiup siulianiit amerlanerulaarlutik, Namminersorlutik Oqartussat taama allapput.

- Nuannaarutigisaqaarput Innuttaasoq atornerluiunnaartoq inuulluaqqugaangatsigu, minnerunngitsumik nuannaarutigaarputtaaq  inuusuttut amerlanerit katsorsartinnerminnik naammassinnittarnerat,” Birgit Niclasen oqarpoq.
 Taassuma innersuuppai ukioqatigiiaat 15-it 24-llu akornanni ukiullit.

 Ukiumoortumik nalunaarusiap ajoraluartumik takutippaa  suleqatigiinneq pitsanngorsarneqartariaqartoq, tassami innuttaasut affangajai taamaallaat katsorsartereernerup kingorna qanoq  iliornissamik pilersaarusiuunneqarsimammata.

- Tamanna ajunnginnerilersissinnaavarput, ataatsimoorluttalu tamanna 2020-mi iliuuseqarfigisariaqarput Birgit Niclasen naggasiivoq.