Flemming Knudsen akissuteqarpoq

Royal Greenlandimi pisortaaneq Flemming Knudsenip Anthon Frederiksenip sulisunik kalaallinik qallunaanillu assigiinngisitsineraanera eqqunngitsuunerarpaa. Royal Greenlandip Glyngøremi suliffeqarfiutaani suliassat allanngornerisa kingunerisaanik sulisut attorneqartut allanik suliaqarsinnaanngorlugit ilinniartinneqarnissaannik allamiluunniit suliffissarsiornissaannik ikiorumallugit neqeroorfigineqarmata Anthon Frederiksen isornartorsiuivoq.

Royal Greenlandimiit ullumi nalunaarutigineqarpoq maanna Danmarkimi sulisunut periaseriniarneqartoq aamma Narsami Aasiannilu raajaleriffiit matuneqarmata periuserineqarsimasoq. Flemming Knudsen aamma oqarpoq siumut isigisoqartariaqartoq, Royal Greenlandillu aktiaatileqatigiiffittut soorunami Kalaallit Nunaanni suliffiit matuissorneqartillugit sulisut eqqorneqartut isumaginiartariaqarai.

Nunatsinnili suliffinni maanna pissutsit allarluinnaapput, tassami raajaleriffinni pingasuni – tassa Paamiuni, Sisimiuni Ilulissanilu sulisussaaleqisoqarmat. Flemming Knudsenillu kissaatigaa Royal Greenlandip sulisoqarniarnera pisortat ikiorsiiffigissagaat, soorlu sulisut maani nunaqavissut inissaannik sanaartornikkut.