Flemming Jensenip atuakkiani asuliinnaannginnerarpaa

Flemming Jensen ima naliliisartunit eqqunngitsumik pineqarsoritigaaq, allaat aviisip Kristeligt Dagbladip atuakkianik naliliisartuata uparuartuineranut akisariaqalersutut misigilerluni.

Kristeligt Dagbladimi naliliisartup atuagaq "Jakob" tassaanerarpaa, Flemming Jensenip atuakkiaanit kingullernit marlunnit katiliinnagaq. Atuakkat pineqartut tassaapput Ímaqa aamma Den skyldiges uskyld.

Uparuaanermi atuagaq nutaaq "Jakob" tigulaariffiginagu siulii pillugit tusagassiorfinnut nalunaarutit tigulaariffigineqarsimapput.

- Tamanna pissusissamisuunngilaq, Flemming Jensen atuartartut oqaasererusutaannut allappoq.

- Soorunami atuakkiakka kingulliit ataqatigiipput, kisianni imarisai taputartuutissallugit pissusissamisuunngilaq. Atuakkap ungaluani allappara, "Jakob" tassaasoq atuakkat saqqummersut kingulliit marluk nanginnerat. Nangitsinerusoq erseqqissaatigiuarpara, ilaatigut tv, radio aviisillu atuakkiaq pillugu apeqquteqaraangata. Ila, ila, nuannaarlunga nassuiaatigisarpara, nanginnerusoq.

Aamma aviisi alla, Berlingske Tidende, atuakkiap imarisaanut uparuaavoq, asuli immerniaannarlugu piumasaannarmik allagaanerarlugu atuagaatigissallugulu pilerinannginnerarlugu. Uparuaanerit arlaliugaluartut nuannersunik aamma naliliisoqarpoq. MetroXpress aamma Ekstra Bladet nersualaarinnillutik allaaserinninnerat Flemming Jensenimut nuannaarutaassaqaaq.