Fish and chips allatut

Fish and chips amerlanerit immaqa takorloortarpaat tassaasut pomfrittit taavalu aalisakkat raspinik qallerlugit siatat. Kisianni fish and chips allatorujussuaq sunaaffa aamma paasineqarsinnaapput.

Uulialerlugit igaassat taakku nutaalianngorlugit takorloorutsigik, taakkugooq silaannaap kissakkiartornera tamatumalu kingunissaa pillugu ilikkagaqartissinnaalissavaatigut, aalisakkammigooq arferillu canadamiut ilisimatuut qarasaasiap atortuisa ilaannik, chippinik, tassa nassitsissutinik, ikkussuiffiginialerpaat. Politiken taama allaaserinnippoq.

Atortorissaarussuaq aalisakkanik uumasunillu ataatsikkut millioninik imavissuatsinni nassaarsinnaasoq ilisimatuut maanna singinnialerpaat. Kapisilinniit eqalussuarnut, arferniit saanilunnut taassuma nassitsissutilersorsinnaassavai. Maluginiuutaassagunartut 5000-it imavissuup ilaani aamma ikkussorneqassapput, aalisakkallu avaleqqamigut nassitsissutillip taanna avaqquppagu ingerlaannaq nalunaarsorneqassaaq.

- Taama misileraanitsinni silaannaap allanngoriartornerata sunniutissai immaqa paasinarsitinnerussavai. Aalisarneq qanoq aqussaneripput paasinarsinerussaaq, aamma aalisakkat uumasullu sorliit nungutaanissaminnut navianartorsiornersut aamma paasisinnaanngussagunarparput, nunanut allanut Canadami ministeri, Peter MacKay oqarpoq.

Misileraanissaq Manerassuarmi ingerlateqqaarneqassaaq, taava Atlantikumut, Issittup imartaanut aamma Mexicop kangerliumarnganut annertusineqassalluni.