Finn Meinel timersornermi siulersuisuniit tunuassamaalerpoq
Kalaallit Nunaanni timersoqatigiit kattuffiat GIF aamma kalaallit arsaattartut kattuffiat KAK Finn Meinelip paarlatsissaanik toqqaassapput kattuffiit taakku marluk qaammat ataaseq qaangiuppat ileqquusumik ataatsimeersualerpata.
- Kattuffimmut suugaluartumulluunniit peqqinnartuusorivara sivisuallaamik inissisimasoqartannginnissaa. Timersornerup siulersorneqarnerani ukiorpaalæuit suleqataareerlunga tunuarnissamut piffissanngorsorivara, Finn Meinel KNR-mut oqarpoq.
Siornatigut Team Grønlandimik taaneqartartumi maanna Elite Sport Greenlandimik taaneqartartumi 2004-mi siulersuisuniilerpoq. GIFip siulersuisuni 2009-mi ilaasortanngorpoq. Finn Meinl aamma 2019 KAK-mi siulittaasunngorpoq John Thorsen siulittaasutut nammineq tunuarnissamik kissaateqarmat.
Uninnissamut piffissaq eqqortoq
KAKp aningaasaqarniarnera ilungersunarsimavoq tamannalu pissutigalugu silami arsaannermi nunanut allanut unammisartut sipaarutaagallarnikuullutik. Maanna silami arsaannermi futsalimilu nunanut allanut unammisartoqaqqilerpoq.
- Ingerlalluarpugut. Allattoqarfitsinni Kaassannguaq Zeeb aamma Nîsínguak Lundblad Geisler assorsuaq sulilluarput, Finn Meinel oqarpoq.
- Tamannarpiaq aamma pissutaavoq maannakkut tunuarnissamut piffissap eqqortuusorinarneranut, Finn Meinel oqarpoq assullu qujamasuutiginerarpaa KAK-mi aningaasaqarniarnerup pitsaanerulersimanera.
AAMMA ATUARUK Kalaallit Arsaattartut Kattuffianni siulersuisunik nutaanik toqqaasoqartoq
Tamatumali tungaanut aqqut KAKmut GIFip ataani kattuffiit annersarisaannut imaannaanngilaq. Aalajangernerit nuanniitsut soorlu silami nunanut allanut unammisartunik unitsitsigallarneq pisarsimapput. Finn Meinel aamma oqarpoq siulittaasunngortussaq assoralisimaarsinnaasariaqassasoq.
- Isumaqatigiinngissutsinik aaqqeeriarsinnaariaqarpoq. Assortuuttariaqalerneq piareersimaffigisariaqarpoq. Kattuffimmi suugaluartumiluuniit siulittaasoq aporaaffiusunik suliaqarsinnaarsiaqarpoq iluaagineqarsinnaasunillu aalajangiisinnaasariaqarluni, Finn Meinel oqarpoq.
KAKmi siulittaasutut kingoraartissaminik toqqareernianngilaq. Finn Meinel aamma timersoqatigiiffimmi B-67-mi suleqataanerminiit tunuareerpoq qilanaalereerlunilu siunissami isiginnaartut akornanniit timersortunik malinnaasarnissaminut.
