Finn Lynge: Nunasiaanerup anersaava suli atorparput

Nunasiaanerup nalaani eqqarsartaaseq suli qimanngilluinnaripput, palasi, EF-parlamentimi ilaasortaasimasoq inuiaqatigiinnillu oqqassaarisoq Finn Lynge, issittoq pillugu ilisimatuut Nuummi ataatsimeersuarnerat ammarlugu, 200-it missaat tusarnaartoralugit, oqalugiarami taama oqarpoq. Qanga qallunaanut oqartussanut maniguunneq ullumikkut kalaallinut pissaanilinnut ingerlateqqiinnarneqarsimasoq, Finn Lynge isumaqarpoq.
Allattoq Jens Thorin
aggustip 22-at 2008 11:24

Finn Lynge isumaqarpoq pisortanut ataqqinninnerujussuaq kingornunneqarsimasoq.

- Qaffasissumik atorfillit allallu assigusumik inissisimasut imatorsuaq ataqqineqartariaqanngillat. Assersuutigalugu naammattoortarpara, kommunini Namminersornerullutik Oqartussat apeqquteqarfigissallugu merserigaat, immaqa iluarissanngimmassuk. Tassa nunasiaanerup anersaava taamaappoq. Nunasiaanerup eqqarsartaasia qimassallugu imaannaanngitsorujussuuvoq. Tassami kalaalerpassuit nunasiaasimasut suli taamatut eqqarsartarput, Finn Lynge oqarpoq.

Nunasiaasimasut sulilu nunasiaasutut misigineq qaagissagutsigu, taava pissutsit ammasumik oqallisigisariaqarivut, Finn Lynge kaammattuivoq, tamatumanilu Ilisimatusarfeqarnerput iluaqutaassasoq isumaqarluni.

- Inuiaqatigiit ilusaata anersaavatalu allanngortinnissaa Ilisimatusarfimmiit aallartittariaqarpoq. Ilisimatuut ilisimatusartullu tassa suliaraat, pissutsit assigiinngitsut erseqqissunngortissalugit paasinartungortissallugillu, tassanilu anersaap kiffaanngissusia atorneqartussaavoq, Finn Lynge, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq