Finn Karlsen unnerluutigineqassanngilaq
Aalisarnermi Piniarnermilu naalakkersuisoq Finn Karlsen Great Greenlandi pillugu nikanarsaasutut unnerluutigineqassanngitsoq Sermitsiaq nutaaq taama allaatiginnippoq.
Taamatut aalajangertoqarnera pillugu eqqartuussisuserisuniit politeeqarfimmiilluunniit oqaaseqartoqarusussimanngitsoq Sermitsiami allassimasoqarpoq.
Taamatulli inerniliisoqarsimanera pillugu ulluni qaninnerni Kalaallit Nunaanni Sulisitsisut Peqatigiiffiat GA ilisimatinneqassasoq erseqqissaatigineqarpoq, taakkumi Finn Karlsen unnerluussassanngortimmassuk.
Sulisitsisut Peqatigiiffiata ukioq februaarimi naalakkersuisoq nikanarsaasimasutut unnerluutigaa.
Taama Sulisitsisut Peqatigiiffiat unnerluutiginnippoq, naalakkersuisup radioavisikkoorluni Ammeriviup Great Greenlandip pisortaa aningaasanik peqquserluuteqarsimasutut pisuutimmagu.
Unnerluussut taanna partiit marluk Siumukkut IA-kkullu akuliuffigiumanngilaat.
Kingornali Ammeriviup pisortaa Mikael Nielsen naalakkersuisut siulittaasuannit Hans Enoksenimit ajuusaarfigineqarpoq.
