Finn Karlsen: -TV aviisi sangutitsivoq!
Nunatsinni anaataalluni puisinniartoqartalernissaanik misileraasoqalernerarlugu oqalunneq unitsittariaqarpoq, tamakkuninngami pilersaaruteqartoqanngilluinnarpoq, taama tusagassiutinut allappoq, Aalisarnermut Piniarnermullu naalakkersuisoq Finn Karlsen.
Taassumattaaq parteeqammi Augusta Sallingip ippassaq radio aviisikkut naalakkersuisut sangujoraartumik politikkeqarnerarlugit uparuaanera akuersaanngilaa.
Aalisarnermut Piniarnermullu pisortaqarfiup pisortaa Amalie Jessen danskit TV-aviisiatigut apriilip 20-ianni apersorneqarpoq, ilanngutassiarlu killorneqangaatsiarsimavoq taamaalilluni ilaannakortumik tigusinikkut annertuumik tusagassiortuniit sangutitserujussuartoqarluni, taama pisortaqarfik tusagassiutinut allappoq, allakkiarlu ima nangippoq:
Erseqqissaatigineqassaaq uani pineqanngilluinnarmat puisit piaraannik anaaleraalluni puisinniartitsinissamik misissuititsinissaq.
Pineqartorlu unaavoq: Aningaasannanniutigalugu misileraalluni puisinniarnissamut qinnuteqaatip itigartinneqarnera.
Great Greenland A/S angallammik tunitsiviliinikkut nunatta Kitaani misiligummik puisinniarnissap aallartinnissaa pillugu qinnuteqaraluarpoq.
Naalakkersuisulli aalajangiipput qinnuteqaat itigartinneqassasoq.
Great Greenlandip qinnuteqaataa naatsumik taallugu ilaatigut ima imaqarpoq:
Qoorortuut atorlugit umiatsiaaqqaniit
puisinniartitsisoqartassasoq, tassa pisarnertut pissutsit atoreersut malillugit. Piniartitsinermilu Ammeriviup piniartut sulisoriniarpai akilerlugit.
Puisit aalisariummut angisuumut tulaanneqartassapput, ”angallat
tunitsivik anaanaq”-tut taallugu. Periuserlu tamanna nutaajuvoq. Periusitoqaq tassaavoq piniartut ataasiakkaarlutik puisinniartut angallateeqqat pujortuleeqqalluunniit atorlugit, namminneq puisi pilallugu kiisalu puisip amia panerserlugu imaluunniit nutaatut kitaani tunitsiviit 71-t arlaannut tunillugu.
Taamaattumik uani pineqanngilluinnarpoq puisit piaraannik hakapika atorlugu anaaleraalluni piniartitsisalernissamut periarfissanik misissuititsinissaq, taama Piniarnermut naalakkersuisoq Finn Karlsen tusagassiutinut allappoq.
