Finn Karlsen: Paasissutissat pisoqalivallaarsimapput

- Isumaqatiginngilara taamatut oqartoqarnera, isumaqarpunga taamatut allaaserinnissimaneq pisoqalereersimasorluunniit, peqqutigalugu piniarneq pillugu isumasioqatigiikkatta mianerisariallit pillugit allaqataasimasut ilaatigut namminneq piniartunut uagutsinnullu oqarput ”qilalukkat qernertat ikileriarsimanngillat, naak taamatut pisassiisoqartaraluartoq, qaqortallu amerleriarsimasut”. Kisianni aajun mianerisariallit pillugit allattorsimaffik saqqummerpoq allatorluinnaq imaqarluni, taamaattumik isumaqatiginngilara, Aalisarnermut piniarnermut Nunalerinermullu Naalakkersuisoq Finn Karlsen oqarpoq. Qilalukkat qaqortat qernertallu mianerisassatut allattorsimaffimmi nungutaanissaminnut aarlerinartorsiortutut nalilerneqartut ima qisuariarfigai:

- Siusinnerusukkut biologit oqartarnerat issuaannarneqarsimagunarpoq, una 2007-imi suliaasimavoq, taavalu kingorna qilalukkanut tunngasunik ilisimatuut imatut oqarput: ” Qilalukkat qernertat taamatut pisassiisaraluartusi ikileriarsimanngillat, illuatungaanilu qaqortat amerleriarsimapput”. Tamatuma aamma nalerpiaani qilalugaq qernertaq Canadami nalunaaqutsigaq Qeqertarsuup tunuani nanineqarpoq, taamaasilluni Canadamiullu qilalugaqatigiissimagunarpugut Finn Karlsen oqarpoq.

Naasut uumasullu mianerisariallit pillugit allattorsimaffik pisoqalisutut nalilikkani ilaatigut atorsinnaanerarpaa, taamaattorli pisoqalisimasunik avammut naqissusiineq ima kinguneqarsinnaanerarlugu:

- Tassa una ima isumaqarsinnaavoq, avataaniit isigineqarnitsinni qilalukkat nungusalerpagut, tassa una isumaqalersitsissaaq pinngitsoorani taamannak, isiginiarneqartorujuusussaallunilu, taamaattumik nutaamik sanapallattoqartariaqassaaq, unami pisoqalereersimasutut uanga nalilerpara, Finn Karlsen oqarpoq.

Mianerisariallit pillugit paasissutissat qaqugu nutarterneqassanersut maanna oqaaseqarfigisinnaanngikkallarlugit, naalakkersuisunut ilaasortaq Finn Karlsen oqarpoq.