Finn Karlsen: Nunaqarfiit ataannarnissaannut periarfissat apeqqutaassapput
Nunaqarfiit 100-it ataallugit inoqartut matuneqassasut Demokratineersup Palle Christiansenip arfininngormat siunnersuutigaa. Tamatumunnga Atassutip siulittaasua Finn Karlsen ima oqarpoq:
- Nunaqarfiit inuussutissarsiornikkut periarfissaat nalilersorneqartariaqartut, nunaqarfiillu inuussutissarsiornikkut periarfissaqanngitsut inuttaasa namminneerlutik tassani najugaqaannassarnerlutik nalilertariaqarpaat. Tassalu pinngitsaaliilluni nuutsitsinissaq uagut piumasarinngilarput.
Palle Christiansen-ip tikkuagaasa ilagaat, nunaqarfinni amerlanerni atugarissaarnikkut aaqqissuussinerit illoqarfinnut naleqqiullugit kinguarsimanerusut. Assersuutigalugu nunaqarfinni atuarfiit kinguarsimanerupput aamma peqqinnissakkut kiffartuussineq kingusinneruvoq.
- Paasisariaqarparput, nunarput taama angitigimmat taamalu inukitsigaluni, ingerlannissaa akisoorujussuusoq. Tassa nunanut allanut sanilliulluta ingerlatsinerput akisunerujussuuvoq. Inuit illoqarfinnut angisuunut nutsertikkaanni, nunarujussuarput inuerullugu, taava nunarujussuarput kikkut paarissavaat, Atassutip siulittaasua Finn Karlsen aperivoq.