Finn Karlsen Atassummi siulittaasutut tunuarpoq
Nalunaaquttap akunnerata ataatsip matuma siornagut Atassummi aaqqissuussaanermut siulittaasup tulliata Jensine Berthelsenip nalunaarutigaa, Atassutip siulittaasuata Finn Karlsenip siulittaasutut tunuarniutini, Atassutip qullersaqarfianut ullumikkut tunniussimagaa.
Allattoq Elisa Isaksen
juunip 16-at 2009 16:51
Tamatuma kingunerisaanik Atassutip immikkut ittumik ataatsimeersuarnissaa ulluinnarni aqutsisut siulersuisuunerillu piareersarlugu aallartereerpaat.
Jensine Berthelsenip Radioaviisimut ilisimatitsissutigaa Atassutip siulersuisuuneri juunip 25-anni Nuummi ataatsimiissasut, immikkut ittumik ataatsimeersuarnissaq, siulittaasumik nutaamik qinersiviusussaq, aalajangiiffigineqarniassammat.
Finn Karlsen taamaalilluni juunip aappaanni Inatsisartunut qinersinerup kingorna, partiit siulittaasuisa tunuartut aapparaat, tassami Siumup siulittaasua Hans Enoksen qinersinerup kingorna aamma tunuareermat.
