Finn Karlsen: Arctic Green Food tapertariaqarpoq

Arctic Green Food naalakkersuisoqatigiit sapaatiummat ataatsimiissutigaat. Aalisarnermut Piniarnermut Nunalerinermullu Naalakkersuisoq Finn Karlsen ima oqarpoq.

Arctic Green Foodimut qaammammut ataasiinnarmut isumaqatigiissusiornissaq aallaqqaammut siunniussimagaluarpaat, aningaasarsiornerulli annerpaartaa nipisaat suaannit pisartoq aallartingajalersoq eqqarsaatigalugu, iliuuseqapallakkusussimapput.

- Qaammatinut pingasunut atuuttussamik isumaqatigiissuteqarusussimavugut, taannalu Arctic Green Foodip akueraa, Finn Karlsen nassuiaavoq.

Neriussimagaluarput ukiup sinneranuttaaq isumaqatigiissusiorsinnaassallutik.

Tunisassiorfiutilik 3,8 millioni koruuninik aningaasaliiffiginissaa suli qulakkiivinneqanngilaq, Inatsisartut Aningaasaqarnermut Ataatsimiititaliaa akuerseqqaartussaammat.

- Akuerineqassanngippat assorujussuaq ilungersunartussaassaaq – nunaqarfimmimi sulisut aamma aalisartut piniartullu aningaasarsiornerat equsoorujussuareerpoq. Politikerit tamatta oqartarpugut nunaqarfinnik inuerusaasoqassanngitsoq, taamaattumik neriuppunga sullissinissamik isumaqatigiissutigisagut ataatsimititaliap akuerissagai neriuppunga, Finn Karlsen naggasiivoq.

Arctic Green Foodimut aningaasaliissutit siornatigut 17 millioni koruuniusimasut ukiormanna aningaasanut inatsimmi 8 millioni koruuninngortinneqarnikuupput, naallu sullissinissamik isumaqatigiissut februaarip aallaqqaataani atorunnaaraluartoq, tunisassiorfinnik ingerlatsivik ukiup sinneranut atuuttussamik suli isumaqatigiinniarusussimanngilaq.

Inatsisartut Aningaasaqarnermut Ataatsimiititaliaa tullianik februaarip ulluisa 25-anni ataatsimiittussaagaluarpoq, imassinnaavorli siuartinneqartoq.