Finn Karlsen apeqqusiivoq

Taamaattumik atsiortitsineq piviusorsiortuunersoq Piniarnermut Naalakkersuisup Finn Karlsenip apeqquserpaa. Dan Jørgensen isumaqarpoq piseqqusiunnaarnissamik siunnersuummut kalaallit tapersersuisariaqartut. Tassunga Finn Karlsen ima akivoq:

- Naamik. Isumaqatiginnaanngilara pissutigalugu nunatsinni puisinniartarneq eqqarsaatigalugu, isumaqarpunga puisinniartartut ikioqatigiittariaqartugut.

Puisit pisarineqartartut puiseqassusianut naleqqiullutik ikittuaraannaasut, amerliartuinnassagunillu issittumi aalisakkanut nungusaataalersinnaasut Finn Karlsen oqarpoq.

- NAMMCO-mi isumaqatigiissutigineqarnikuuvoq, nungukkiartuutaanngitsumik puisittarineqarsinnaasut ullumikkut pisarineqartartunit amerlanerujussuusinnasariaqartut.

Ukiorpaaluit matuma siornagut Europamiut puisit amiinik Canadameersunik mattussinerat nunatsinnut annertoorujussuarmik eqquisimasoq puigussanngikkipput Finn Karlsen isumaqarpoq.

- Ullumikkut Canadamiut kisimik piniarneqaraluarpataluunniit EU-milu siunnersuummut uagut tapersersuissagutta piniartortatta qanorujussuaq eqqugaanissaat nalunngilarput.

Naalakkersuisut tamanna pillugu paasisitsiniaallutik EU kommissionimut allagarput, ullumi nassiunneqartumik.

- Oqaatigineqarmat nunatsinni puisittarineqartartut nunarsuarmi puisittarineqartartut tamarmiusut 3 procentiinnarigaat, taamaattumillu pisoqarpat sunniuteqarnavianngitsut. Taamaattoqanngilluaasarpoq.

Nunatta puisittarisartagai procentit pingasuinnaanngillat, 21 procentiusut paasivakka.

Danamarkimi Socialdemokratit EU-mi ilaasortaatitaata Dan Jørgensenip oqaaseqarnermini tunngavigisai piviusortuunngitsut Finn Karlsen naliliivoq.

-Qangali nalunngilarput Dan Jørgensen puisit kisiisa eqqarsaatiginagit ammali soorlu arferit pillugit sakkortuuliorniartartuusoq. Immaqa nammineq soqutigisaminik tunnagveqarnerusimavoq, taamaattumik isumaqarpunga taamatut oqalunnera Danmarkimi tapersersorneqarnavianngitsoq.

Akerliulluni atsiortitseqattaarnerup piviusumik tunngaveqarsimanissaa Finn Karlsenip qularnartoqartippaa.

- Soorunami atsiortitsineq piviusumik tunngaveqarluni ingerlanneqarsimanissaa eqqarsarnartorujussuuvoq, ilumut piviusorsiortuusimanissaa. Kisianni tusakkagut tunngavigalugit nassuiaanneqarpugut paasivarpullu qanoq isilluni sunalu neqetaralugu atsiortitseqattaartoqarsimasoq. Tassa fiisternermi, katerisimaarluni fiisternermi atsiortitseqattaarsimasut oqaluttuunneqarpugut. Taamaattumik taamatut atsiortitseqattaarsimaneq piviusorsiortutut uanga oqaatigisinnaanngilara, Finn Karlsen oqarpoq.