Finn Karlsen aniguivoq

Avataasiorlutik aalisartut, aalisarnikkut aningaasarsiornerup misissuiffigeqqissaarnissaanut peqataanissaminnut maannakkut piariinnguatsiarput. Tamatumani umiarsuaatillit manna tikillugu piareersimanngillat.

Sulisitsisulli peqatigiiffiannit aalisarnermut pisortaqarfimmut allakkat naapertorlugit suliniuteqartut tamarmik peqqissaartumik misissuinissamut maanna piareerput.

Allakkat 10. oktoberimik ullulerneqartut Naalakkersuisuni ilaasortaq Finn Karlsen nalunaarummik Inatsisartunut ingerlatitseqqinngitsoorsimasoq pillugu tatiginninnginnermik taasisitsinissamut periarfissiipput. Akerlianilli taanna ullumi oqaluttarfimmiit oqarpoq Naalakkersuisut misissueqqissaarnissamik tutsuiginartumik suliaqarsinnaasimanngitsut, pissutigalugu umiarsuaatileqatigiit pinaasermata.

Finn Karlsenip illuatungiliuttunit tamanit tatiginninnginneq anigorpaa, Siumup Atassutillu amerlanerussuteqarnertik Naalakkersuisunut ilaasortamut tatiginninnerminnut nalunaarutigalugu taasimmata.

Tamannalu immaqa Palle Christiansenip Demokraatineersup siumut takorloorsimavaa. Taassumami erseqqissaatigaa ilumuunnginneq ilumoornermut sangutinneqarsinnaanngitsoq, amerlanerussuteqarneq pissutigiinnarlugu.

Siullermik Aalisarnermut ataatsimiititaliap sulisitsisut saaffiginnissutaat oqaluuseqqaartussaavaa.