Finlandip præsidenterisimasaa nersornaaserneqarpoq
Ahtisaari qujassuteqarnerminut atatillugu USA-p præsidentissaanut piumasaqarpoq.
- Nunarsuarmi eqqissineqassappat USA peqataasariaqarpoq, tamannalu præsidentissap Barack Obamap isumagisariaqarpaa, pingaartumik Kangiani Qiterlermi ajornartorsiutit qaangerneqassappata, 71-inik ukiulik Finlandimi præsidentiusimasoq Balkanimilu Europap kangiani eqqisseqatigiissitsiniartuusimasoq qujassutimini oqarpoq.
Ahtisaari, nunarsuatsinni nunavinni arlalinni aaqqiagiinngittoqartillugu ukiut tredivet ingerlanerini isumaqatigiissitsiniartartuunermigut ataqqiniarneqartoq isumaqarpoq Kangiani Qiterlermi eqqisseqatigiissitsinissaq pingaarnerpaasoq.
- Ukiorpassuarni iliuuseqartuusaartuarneq qaangertariaqarparput, inernernik takusariaqalerpugut, oqarpoq.
Ahtisaari isumaqarpoq nunarsuarmi pimoorussamik eqqisseqatigiittoqassapput USA, Rusland Europalu suleqatigiilluinnartariaqartut.
