Finlandimiut aputaajaanermik ilinniartitsiniarput
Taassumami Europami mittarfeqarfinni pisortaqatini Finlandimut qaaqqusimavai ilitsersuukkusullugit ukiorlunnerani mittarfeqarfiit qanoq ingerlanneqarsinnaanerinik.
- Ilisimasagut ingerlateqqikkusuppagut, taamaalillutik ukioqqinnissaanut piareersimalluarnerussammata, Samuli Haapasalo oqarpoq, taanna Finavia Corporation-imi, tassa Finlandimi mittarfeqarfinni ingerlatsivimmi, pisortaavoq.
Finlandimiut Europami mittarfeqarfinnut allanut ikiuukkumalernerat saqqummerpoq, misissuisimanerup inerneri saqqummiunneqareersullu, tassani innersuussutigineqarpoq Finlandi nunani tamalaani ajornartorsiutinik anguisinnaasutut saqqumilaarnerusariaqartoq.
- Misissuinerup takutippaa, Finlandimi pissutsit ingerlalluartut. Eqqartortannginnerali ajornartorsiutigaarput. Taanna allanngortikkusupparput, taama Finlandip nunanut allanut ministeria Alexander Stubb oqarpoq.