Finlandimiut aliasupput

Atuarfik sapaatip akunnerata sinnerani matoqqassaaq, atuartullu tarnip pissusaanik ilisimasalinnit ikiorserneqassapput, politiit misissueqqissaassapput sanasullu aserukkanik iluarsaassissallutik.

Toqoraaneq pillugu paasissutissat amerlanerit ullumikkut saqqummiunneqarput. Soorlu atuarfiup pisortaa 60-inik ukiulik ippassaq nalunaaqutaq 11.44 højtaleritigut mianersoqqusivoq aamma ilinniartut ilinniartitsisullu inini atuartitsiviusartuniittut matunik parnaarsuinissaannik kajumissaarilluni.

Tamatuma kinguninngua atuartup 13-inik ukiullip atuarfiup pisortaa, 18-inik ukiulimmit Pekka-Eric Auvinen-imit uppitinneqartoq takuaa, kinguninngualu taanna torsuusarsuakkut illuinnarsuuserluni pisulerpoq ininullu atuartitsiviusunut iseqattaalerluni. Minutsit qulit qaangiummata politiit immikkut sungiusarsimasut takkupput atuartullu ilaat igalaat aserorlugit qimaaniarsarilerlutik.

Nalunaaqutaq 12.04 Pekka-Eric Auvinen naggataamik igippoq, tassa nammineq aallaagami kinguninngualu ilisimajunnaaqqasoq politiit nassaaraat, niaqqumini tullimigut imminut aallaasimasoq. Taama pisoqartinnagu atuartut arfineq marluk atuarfiullu pisortaa aallaallugit toquppai. Nukappiaq ippassaq unnukkut qulit eqqaanni napparsimmavimmi toquvoq.