Finlandimi inatsimmik sukateriniarneq tapersersorneqarpoq
Kauhajokimi borgmesteri, Anti Rantakoko isumaqarpoq Finlandimiut oqaloqatigiinneq atorpallaarnagu aallaasersorniarnerusarmata aallaaseqarsinnaanermut inatsisit sukatertariaqartut. Politiit aallaasersortup najugaanik misissuinerminni pasivaat nukappissap aallaasersornissani ukiuni arfinilinni piareersarsimagaa. Finlandimiut 700.000-it aallaaseqarsinnaatitaapput aallaasillu assigiinngitsut 1,6 miliuunit pigineqarput. Taamaalillutik Finlandimiut nunarsuatsinni sakkoqarnerpaat ilagaat, USA-mit, Yemen-imit Schweitzimillu taamaallaat qaangerneqarlutik. Danmarkip Radioaniit ilanngutassiortoq, Finn Halfdan Finlandimiit oqaluttuarpoq Finlandimiut amerlanersaasa taama amerlatigisut sakkoqarsinnaanermut akuersissummik peqarnerat ernumanartutut isigigaat, minnerunngitsumik inuusuttuaqqat aallaasitaarsinnaanerat ernummatigineqarpoq. Piniartoqartuaannarnikuummalli inuit amerlanerusut taama amerlatigisut aallaaseqarnerat sungiusimavaat, taamaammat inuusuppallaat aallaasitaarsinnaanerat unitsinniarlugu inatsisit allanngortinneqarsinnaanerat amerlanerit ornigineruaat. Ministeriunerup oqarneratut illoqarfeeqqani nunaqarfinnilu inuusuttuaqqat tarnikkut ajornartorsiortut amerlaqaat, tammakkualu pissutigalugit ippassaq pisup assinganik pisoqaqqissinnaanera aarleqqutigineqarpoq.
18-nik ukioqalereersimasut kisimik aallaaseqarsinnaanermut akuersissummik pisinnaalernissaat ministeriunerup maanna siunniuppaa.
