Finlandimi imminortartut ikilisimaqaat

1990-mi imminortut 1500-juusimapput. Siorna 1000-t sinneqalaaginnarsimallutik. Skandinaviami nunanit tamani Finlandimiut imminnut toquttartut suli amerlanerpaajugaluartut, taamaattoq ikileriarsimaneri malunnaqaaq, nittartakkakkut nutaarsiassaqartitsivik, Icenews.is allappoq.

Imminortartut ikilinerannut pissutaanerpaavoq, Finlandimi nuna tamakkerlugu imminortarnerup paasisitsiniaaffigineqarnera kiisami iluatsimmat, Finlandimi Peqqinnissaq aamma Atugarissaarneq pillugu institutimi professori, Jouko Lonnqvist isumaqarpoq.

Nittartakkatigut attaveqaatit assigiinngitsut, ilaatigut ukuusut: Facebook, Twitter aamma MySpacep atugaanerujussuisa paasisitsiniaanerup iluatsinneranut pissutaaqataatinneqarput. Mobiltelefonip atugaalluarnera aamma pissutaasoq erseqqissaatigineqarpoq.

- Qangamut naleqqiullugu inuit kiserliunnginnerulersimapput. Nittartakkatigut attaviit inunnit kiserliortunit atorneqarnerulersimapput, Jouko Lonnqvist oqarpoq.

Professorip aamma erseqqissarpaa, imminornissamut eqqarsaateqartut imaluunniit inuit isumatsassimagaarnermik nappaateqartut Finlandimiunit eqeersimaarfeqarnerulersimasut.

Nunani Avannarlerni Kalaallit Nunaanni imminnut toquttartut amerlanerpaajupput, tulliullutik Finlandimiut.