Finland russisut innuttaassusillit Finlandimut isersinnaanissaannut sakkortuumik killiliiniartoq

Finland Ruslandip killinganiittuusoq, qaammatip tullianiit russisut innuttaassusilinnut tamanut Finlandimut isernissamut sakkortuumik killiliiniarpoq.

Finlandip nunanut allanut ministeria, Pekka Haavisto, taama ilisimatitsivoq.

Ministerillu taassuma oqarnera naapertorlugu, septembarip aallaqqaataa aallarnerfigalugu russisut innuttaassusillit Finlandimiissinnaanerat maannakkut amerlassusaasumiit 10 procentimik appartinneqassaaq.

Tassalu imaappoq, septembarip aallaqqaataa nallertinnagu visummimik tassa nunamut isersinnaanermut uppernarsaammik inniminniisinnaanermut piffissarititaasut killeqalissapput.

Finland, Ruslandip Ukrainemut sakkulersulermalli Natomut ilaasortanngorumalluni qinnuteqarpoq, soorluttaaq Sverige aamma taamaaliortoq.

AAMMA ATUARUK Finlandip Sverigellu NATO-mut ilaasortanngorsinnaanissaat Tyrkiap maanna tapersersoraa

Nato Ukrainemi sorsunnermut atatillugu pingaaruteqaqaaq.

Ruslandimmi piumasaraa, Ukraine Natomut tassa naalagaaffiit illersornissaq pillugu peqatigiiffiannut ilanngutinngisaannassasoq, russillu taamatut piumasaqarnerat Natomiit akuersaarneqanngilluinnarpoq.

Russillu oqarnerat naapertorlugu Ukraine Natomut ilanngutissagaluarpat isumannaallisaaniarnermut akornusiissallutik siorasaaruteqarput.

Nunallu Natomut ilaasortaasut arlalippassuit Ukrainemut sakkutuut atugassaannik sakkunik tapersiillutik tunniussipput, sulili manna tikillugu Natop sakkutuuinik Ukrainemut nassiussisoqanngilaq, Ukrainemi suli Natomut ilaasortaanngimmat.

Danmark, Island, Norge Natop ilaasortaanut 30-usunut akuupput. Finlandillu kangiatungaa tamarmi Ruslandip killigaa.