Aningaasanut inatsisissaq piffissaqarfiginerumavaat
Inatsisissatut siunnersuummi aqagu marlunngornermi tuaviortumik suliarineqartussami aningaasanut inatsisissamik atuutsitsilernissaq Naalakkersuisup Aqqaluaq B. Egedep novembarip 25-anut kinguartinniarpaa.
Tamanna nunatta aappaagumut missingersuutaanik aningaasanut inatsip Inatsisartunilu atuutsitilernissaataa suliarineqarnera ullunik qulinik sivitsuivoq.
Aningaasanut inatsip piareernissaanut sivitsuerusunneq nalakkersuisoqatigiit nikinnerannik peqquteqarpoq. Naalakkersuisut nutaanngornerannit allannguutit ilanngunnissaannut piffissaq sivisunerusoq pisariaqartinneqarpoq, Inatsisartullu aningaasanut inatsimmut siunnersuummik suliarinninnissaminnut aamma piffissaqassapput, Naalakkersuisoq taama ilaatigut allaaserisaqarpoq.
Nunamut tamarmut akileraarutip oqallisigineqarnissaa siunnersuummi 25-anut aamma kinguartinneqarpoq, kommunimut akileraarutit, kommuninilu paaqqinniffinnut akit oqalligineqarnissaat decembarip ulluisa arfineq-aappaannut kinguartinneqarput.
Sivitsuinissamut siunnersuut suli tusarniaassutigineqanngilaq, kommunilli nalunaarfigineqareerput.
