Filmitsialak 'Qivittoq' takutinneqaqqilerpoq
Erik Balling ilitsersuisoralugu filmi Kalaallit Nunaanni filmililiaavoq, qallunaallu filmiliaanni siullersaalluni Oscarinnatussatut innersuunneqarluni. Filmimi pingaarnertut inuttaapput taamanikkut tusaamasarsuit Poul Reichhardt, Astrid Villaume, minnerunngitsumillu kalaalersaat Niels Platou.
Filmi immikkut qaaqqusanut Palads-ip filmertarfiani Københavnimi januaarip sisamaanni takutinneqarpat qaqutigoortumik takuteqqinneqassaaq. Filmi ullumikkuugallartumik ataasiaannarluni takutinneqassammat allat tamarmik dvd-ngorlugu pisiarisinnaavaat angerlarsimaffimmilu takullugu. Kisianni tassa filmerumatuunut pisoq nuannersuuvoq. 'Qivittoq' Nordisk Filmip filmiliaani takorusunneqarnerpaanut ilaavoq, taamaakkaluartorli TV-kut takutinneqanngisaannarsimavoq VHS-ikkut DVD-kullu aatsaat aamma ullumikkut imminiunneqarluni. Tamatumunnga pissutaavoq Nordisk Filmip filmimik piginnittut sivisuumik isumaqatigiissuteqarfiginiarsimammagit, aatsaallu isumaqatigiissuteqarfigisimallugit.
Filmip takuteqqinnissaanut iluarsaassineq annertooq ingerlasimavoq filmip rullitai annertuumik ajoqusersimammata. Filmimik iluarsaassisuusimavoq produceri Tove Jystrup.
- Uannut filmi meeraaninniilli pilerinartuusimavoq, aamma inuppassuit aperisarsimapput sooq filmi saqqummersinniannginneripput. Taamaalimmat filmip atornissaanut pisinnaatitsissutit pissarsiareriasaarpagut, aamma filmip iluarsaanissaanut akissaqalerluta, periarfissaqalerlutalu nutaatut saqqummersinnissaanut, Tove Jystrup oqaluttuarpoq.
Filmip imaraa piniartoq Pavia, Niels Platou-mit inuttaaffigineqartoq. Taassuma takusinnaavaa inuuneq ingerlaqqissappat aalisarnermut ikaarsaartariaqarluni. Aamma ilinniartitsisoq Eva, Astrid Villaume-mit inuttaaffigineqarpoq. Taassuma aappassiartaani illoqarfimmi Frederiksminde-mi najugalik tupaallatsinniarpaa, allamilli arnaatilik siumorlugu. Minnerunngitsumillu nunaqarfiup pisortaa Jens, Poul Reichhardt-ip inuttaaffigisaa. Aamma taanna asanninnerup tungaatigut iluatsitsivallaarsimanngitsoq. Taassuma ikinngunni Pavia navianartorsiorluni annaanniarsaraa, namminerli navianartorsiulerluni ikiorserneqartariaqarluni.
- Filmi 'Qivittoq' filmit qalipaatillit pingajorimmassuk pingaartuuvoq, filmillu immiunneqarnerani inuk ataaseq Kalaallit Nunaanniit immiussaminik Danmarkimut nassitsisarsimammat nalullugu immiussai iluatsissimanersut, aamma assit Kalaallit Nunaanni pinngortitameersut kusanarluinnartut filmimi ilaammata, Tove Jystrup oqarpoq.
Taamanikkut 'Qivittoq' Oscarimik akissarsisinneqanngitsoorpoq, akerlianilli 1957-imi Cannes-festivalimi filmitut piviusorsiortutut pitsaanerpaatut akissarsisinneqarluni.
