Filmimik "Kalaallit Nunaanit qimarranneq"-mik aaqqissueqataasoq: -Kukkunngilagut!

Taakkua ilagaat tusagassiortoq Jens Møller, taassumalu erseqqissarpaa Danmarks Radio sinnerlugu oqaaseqannginnami, namminerli isummaminik saqqummiussigami.

- Kalaallit Nunaanni tusagassiortutut ukiuni pingasuni sulereernikuuvunga. Naalakkersuinermillu suliaqartut taamatut qisuariarnissaat naatsorsuutigereernikuuara.

Aamma innuttaasut qisuariaataat qiviarutsigik ajunngitsorpassuarnik qisuariartoqarpoq. Qisuariaatini maluginiarneqarsinnaanerpaatut isigisara tassaavoq, meeqqat inuusuttullu pillugit oqallittoqarnera. Tamanna nammineerlunga nuannaarutigeqaara, tassami meeqqat inuusuttullu oqallisigineqalernerannut aallakaatitassiaq pisooqataammat, Jens Møller oqarpoq.

Taanna aperineqarami taamatut aallakaatitassiornikkut Kalaallit Nunaannik isiginninnermik aalajangersimasumik pilersitseqataasimanini qanoq igineraa, akivoq, nammineq meeqqat inuusuttullu ajornartorsiutaannik pilersitsisuunani, ajornartorsiutilli tusagassiortutut oqaluttuariinnarini.

- Soorlu niviarsiaqqat pingajorarterutaasa kinguaassiuutitigut atornerlunneqartarnerannut tunngasoq aamma angutit inuusuttut qulerarterutaasa kinguaassiuutitigut atornerlunneqartarnerannut ajornartorsiutit uanga pilersitarinngilakka. Uanga tusagassiortutut akisussaasunut apeqqutinik, tassa kalaallit politikeriinut saqqummiussiinnarpunga.

Jens Møller aperineqarami Kalaallit Nunaata eqqunngitsumik danskinit tusaamaneqalerneranut pisooqataannginnersoq, tamatumunnga akivoq, Kalaallit Nunaannik isornartorsiuinani aallakaatitassiarpassuarnik peqareersoq, soorlu Troels Kløvedal sineriak sinerlugu aallakaatitassiornikuuvoq aamma Claus Meyer qaqqamiilluni umimmammik siatsisoq aallakaatitassiarineqareerpoq, tamakkualu Kalaallit Nunaat allatut saqqummiuttarpaat.

- Kisianni ilumoorpoq, apeqqutinik nuannarineqartuaannanngitsunik saqqummiusseqataagama. Apeqqutillu taamaattut annernaraluarpataluunniit saqqummiunneqarnissaat tusagassiortutut pisussaaffigaara, Jens Møller naggasiivoq.

Apersuineq radiukkut aqagu danskisut aallakaatinneqartussamit taaguuteqartumit “Året efter Flugten fra Grønland”-imit issuagaavoq.