Filmiliortitseqatigiiffissuaq arnamik Inummik inuttassarsiortoq
Arnaavit naggueqatigiinnit inunneersoq, nunanilu tamalaani filmiliornermik suliaqarusullutit? Taava maanna iliuuseqartariaqarputit. AMC networkimi tv-kkut nangeqattaartuliassaminut, The Terrorimut, Canadap sineriaani pisuusaartinneqartumut pingaarutilimmik inuttassaminik arnamik inuusuttumik 16-it 30-llu akornanni ukiulimmik pissarsiorpoq. Arnaq pissarsiariniagaat naggueqatigiit oqaasiinik oqalussinnaassaaq. Inuppiattut, inuktitut kalaallisullu.
The Terror, tuluit sakkutuuisa imarsiortut Canadap sineriaani 1847-mi sikkussaanerat pillugu oqaluttuaavoq piviusulersaarut. Tassanilu arnaq naggueqatigiinnit inunneersoq pingaarutilimmik inissisimavoq. Taassumami imarsiortut sikkussaaqqasut attaveqarfigai annanniarnerannullu peqataalerluni.
Arnaq pineqartoq nukittuujuvoq, silatooq misigittartorlu.
AMC networkip nangeqattaartuliassaminut inuttassarsiornerani ilinnut piukkukkuit taava iliuuseqapallattariaqarputit.
Septembarimmi 31-ani internettikkut inuttassanik misiliisoqassaaq immiussinerillu oktobarip qaammataani aallartinneqassallutik.
Soqutiginnittut Ungarnimi qaammatini arfinilinni najugaqarsinnaassapput. Nangeqattaartuliarmi Budapestimi immiunneqartussaavoq.
Inuttassarsiuunneqartoq misilitsinnissarlu pillugit paasissutissat amerlanerusut allaaserisap ataani atuarneqarsinnaapput.
