-Uggornaqaaq Inuit Ataqatigiit Inatsisartuni siunnersuutaat itigartinneqarmat, taama kalaallit filmiliortartut ilaat Laila Hansen oqarpoq. Kalaallit filmiliortartut filmiliornissaannut tapiissutissat ukiumut 400.000 koruuniusartut 2 millioni koruuninngortinneqarnissaannik Naalakkersuisut sulissutiginneqqullugit Inuit Ataqatigiit siunnersuutaat, Inatsisartuni amerlanerussuteqartunit tallimanngormat itigartinneqarpoq. Filmiliortartup Laila Hansenip nunatsinni filmiliortarnermi massakkut atukkat ima naliliiffigai:
-Nunatsinni filmiliortarneq massakkut uninngagallarpoq. Kalaallit filmiliartartunik nunatsini najugaqartoqarpoq ilaallu nunani allani ilinniartuullutik, maaniittullu assigiinngitsunik piareersaateqarluarlutik uninngagallarput, akissaqannginnamik.
Tamanna pillugu Laila Hansen isumaqarpoq nunatsinni filmiliortarneq aningaasaliiffigineqarnerusariaqartoq, filmiliortarnermillu ilinniarsimasut eqqumaffigineqarnerusariaqartut.
- Soorunami asuliinnaq ilinniarnikuunngilagut. Assersuutigaa nakorsanut ilinniarsimanngitsunut nakorsiarnissaq soorunami orniginarnavianngitsoq.
- Aningaasaliisartut filmiliortartullu oqaloqatigiinnerusariaqarput suleqatigiinnerusariaqarlutillu.
Inuiaat kikkulluunniit filmiliortarnermik pisariaqartitsisut erseqqissaateqarpoq.
-Soorlu tv-kkut nangeqattaartut, kusanartumik torersumillu suliat. Nunatsinni oqaluttuat oqaluttuaatitoqqallu filmiliarineqarsinnaapput- tulluusimaatuissatsinnik. Aamma nipilersukkanik videoliat nittarsaannissamut pingaaruteqarput. Takornariartitseqatigiit qassi millioninnattarput, kisianni soorlu filmi torrallataaguni sumulluunniit angallanneqarsinnaavoq, taamaalilluni nunarput avataaniit ilisariartorneqassagaluarpoq.
Laila Hansen, filmiliortartoqatini
Jørgen Chemnitz, Kunuk Platou aamma Karsten Heilmann sinnerlugit oqaaseqarpoq.