Filmiliorniat arfineq-marluk 1,5 millioninik tapertipput
Filmiliassanut qinnuteqaatit 15-iusut, tassaasut oqaluttualianik, naatsulianik piviusulersaarutinillu filmiliassanut tapiissutinik qinnuteqaatit akornanni ilaat arfineq-marluk akuerineqarput, aningaasanik 50.000 koruunit 750.000 koruunillu akornanni tapiissutitallit. Katillugit 1,5 millioni koruunit agguaanneqarput.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Mimi Karlsen 2010-mi filmiliornermut tapiissutinut akuersinermini nuannaarutigalugu nalunaarutigaa, Namminersorlutik Oqartussat kingumut ukioq manna aliikkutassiatut filmiliamut nutaamut annertuumik tapiissuteqarmata.
Annerpaamik tapiissutisipput filmiliortitseqatigiit Tumit Produktion aamma filmiliariniagaat pissanganartuliaq ”Iliveq”.
Tapiissutisisut allat tassaapput:
Tupaarnaq Rosing Olsen: TV-kkut isiginnaagassiaq piviusulersaarusiaasoq ”Kalaallit Nunaata politikkikkut oqaluttuarisaanera 1939-79”.
Jens Rafaelsen: filmi piviusulersaarusiaasoq ”Ukioq kaajallallugu umiatsiaararsorluni aalisartoq piniartorlu”
3900 Pictures: filmi piviusulersaarusiaasoq ”Nordafar”
Tumit Produktion: filmi piviusulersaarusiaasoq ”Hinnarik Sinnattunilu - tunuaniit”
Ivalo Frank: filmi piviusulersaarusiaasoq ”Inuit Nipaat” aamma Saqqummersitsinermi ”KUUK”-mi ilaasoq
Chilbal Film: filmi piviusulersaarusiaasoq ”Grønlands heldige kartoffel”
Kulturikkut tapiissutinit, filmiliornernut annikinnerusunut tullianik qinnuteqartoqarsinnaavoq ulloq 15. september 2010 nallertinnagu.
Kulturikkut sulianut legatinik manuskriptiliornermut atugassanik maajip aallaqqaataatinnagu aamma qinnuteqartoqarsinnaavoq.
Qinnuteqaatinut immersuiffissat www.nanoq.gl aqqutigalugu piniarneqarsinnaapput.
