Filmiliaq kalaalerpaluttortalik takutinneqangajalerpoq
Filmi “The last Airbender” aggustip 19-anni Danmarkimi takuteqqaarneqassaaq nunatsinnili qaqugu takuteqqaarneqassanersoq suli aalajangiunneqarnani.
-Aasap ingerlarnerani takutissinnaanissaa neriuutigaarput, filmeriartarfimmi saaffiginnittarfianilu pisortaq Ove Heilmann oqarpoq.
Filmimi pingaarnertut inuttaasut ilagaat Jason Rahtbone Twiligth filmini inuttaanermigut tusaamasaallualersoq. Canadami aviisinit apersorneqarnermigut filmiliornerminni misigisani nuannarilluinnarsimallugit oqarsimavoq.
-Misigisaq imaannaanngitsuuvoq upperisassaarpiarnanilu. Nuna kusanaqaaq immaqalu inuit eqqarsassapput filmimi assilisarineqartut ilaat qarasaasiami ilioqqagaasut, kisiannili taamaanngilaq, Jackson Rathbone oqarpoq.
Filmimi nukappiaraq Aang aqqaneq-marlunnik ukioqartoq oqaluttuarineqarpoq, taassuma inuiaat sisamat oqimaaqatigiissumik inooqatigiisinniarsarai, taakkualu tamarmik immikkut silaannarmik, innermik, imermik nunamillu aqutsisuuupput.
Nunatsinni assilisat Ilulissaneersuupput Ilulissallu kangerluaneersuullutik katillugulu minuttinik arfinilinnik sivisussuseqarlutik.
-Nunatsinni assilisat Hollywood-imi filmiliami ilaasarnerat ullut tamaasa misigisanngilarput, Kalaallit Nunaata Takornariaqarnermik Inuussutissarsiuteqarnermillu siunnersuisooqatigiivini attaveqarnermik siunnersorti Malik Milfeldt oqarpoq.
Filminik ilitsersuisuusarnermigut tusaamasaq M. Night Shyamalan filmimi ilitsersuisuuvoq taassumalu 6. sans aamma ilitsersuuffigivaa.