Filmi "Silent Snow" soqutigineqangaatsiassagunarpoq
“Silent Snow” Hollandimiumit filmiliortartumit Jan van den Bergimit filmiliaavoq, New Yorkimilu katersugaasivissuarmi American Museum of Natural Historymi aaqqissuussinermut “international polar weekend”-imik taaguutilimmut atatillugu sapaatiuppat takutinneqassalluni. Sermitsiami tamanna atuarneqarsinnaavoq.
Filmi Berlinimi piffissami matumani filmfestivalertoqarnerani aamma takutinneqassaaq, tamannalu pissalluni pingasunngorpat februaarip aqqarnanni. Filmi Parisimi, Monacomi aamma Århusimi marsimi takutinneqassaaq.
- Filmimi “Silent Snow”-imi – toqunartut avatangiisinik mingutsitserujussuartartut – soorlu DDT aamma PCB sammineqarput, taakkumi immap sarfai aqqutigalugit, nunani kujasinnerusuni suliffissuaqarfiusunit Issittumut, taamalu Nunatsinnut annguttarput, “Silent Snow”-imi peqataasoq Ole Jørgen Hammeken Sermitsiap oqarpoq.