Filmi pissanganartuliaq immiunneqalerpoq

Tumit Productions aappassaanik filmiliorpoq. Filmiliaat siulleq tassaavoq ”Hinnarik sinnattunilu”. Filmi taanna akeqarpianngitsumik suliarineqarpoq, filmertarfinnilu takutinneqarnermini isiginnaarianit soqutigineqarluarluni. Tamannalu aappassaanik filmiliornissamut qiimmassataasimasoq, Malik Kleist, Tumit Productionsimik piginneqataasoq, oqaluttuarpoq.

Filmimi inuusuttut ilinniarnertuunngorlaat tammaarsimariarlutik aasarsiortarfimmukartut, sammineqassapput. Ullup aappassaani eqqumiitsunik assigiinngitsunik pisoqallattaalerpoq, inuusuttulli paasivaat Qivittumit malersorneqarlutik, Malik Kleist, filmimi ilitsersuisoq oqaluttuarpoq.

Filmip nutaap pitsaassusaa qaffasinnerussasoq, kiisalu isiginnaartitsineq takutitsinerlu immikkut pingaartinneqassasut, Malik Kleistip oqaatigaa.

Tumit Production inuusuttuaqqanik peqataasussanik aprilip aallartilaarnerani aggersaassapput, naatsorsuutigineqarporlu filmi 2011-mi upernaakkut naammassissasoq.

Stina Berthelsen Aka Hansenilu ingerlatsitsisuussapput, Malik Kleistilu ilitsersuisuussalluni.