Filmi "Kalaallit Nunaannit qimarranneq" danskit kalaallinut isiginninnerannut sunniivoq
Danmarkimi ilinniartut tv-kkut aallakaatitassiamik takusaqareernermikkut, Kalaallit Nunaannik inuiaqatigiinnilu pissutsinik allaaserinnikkusullutik saaffiginnittartut amerleriarsimapput.
Assersuutigalugu tusagassiortunngorniat imaluunniit universitetini ilinniagaqartut naammassinissaminnut atatillugu Kalaallit Nunaanni pissutsinik imaluunniit kalaallinik atugarliortunik Danmarkimiittunik allaaserinnikkusuttut amerlanerulerput, taama oqarpoq Kalaallit Illuutaanni tusagassiisartoq Lisbeth Vahlgreen.
Taassuma suleqataata Vivi Nielsenip danskit Kalaallit Nunaannik aamma kalaallit ajornartorsiutaannik soqutiginnilertarnerat takkuttarlunilu qaangiuttarnerarpaa.
- Atuartut paasiniaallutik pulaaraangamik ilaannikkut eqqumiiginarsinnaasunik apereriataartarput.
Soorlu 4. klassimi atuartut ilaat aperisinnaasarpoq: Kalaallit Nunaanni imigassartortoqartaqaa? Taama aperisoqaraangat eqqarsariarnartarluni suminngaanniinngukua tamakku tusaamavigit? Vivi Nielsen oqarpoq.
Danmarkimi atuartut 4. klassinngoraangamik Kalaallit Nunaat pinngitsooratik sammisussaavaat, tamatumunngalu atatillugu atuaqatigiit Kalaallit Illuutaannut pulaartarput.
- Maanna suliniutigilerparput, ilinniartitsisunngornianut Kalaallit Nunaat pillugu paasissutissiisalerniarluta, taamaalilluni ilinniartitsisut 4. klassinut sammisaqartitsilinnginnerminni Kalaallit Nunaat pillugu ilisimasaqarluarnissaat anguniarlugu, Søren Thalund naggasiivoq.
