Filmi Inuk Woodstockimi takutinneqassaaq
Filmip piviusunik tunngaveqartup Inuk 16-inik ukioqartoq oqaluttuaraa, taanna anaanaminit imerajuttumit angutisiaminillu annersaasartumit arsaarinnissutigineqarpoq Uummannamilu meeqqat angerlarsimaffiannut inissinneqarluni. Piniartoq Ikuma tassani naapippaa piniariaqatigalugulu.
Inuk 2008-mi immiussaavoq. Inuiaqatigiit pissusaannik ilisimasalimmit Jean-Michel Huctinimit Mike Magidsonimillu allagaavoq, kingulliullu aamma ilitsersuussiffigivaa. Gaaba Petersen (Inuk) aamma Ole Jørgen Hammeken (Ikuma) pingaarnertut inuttaapput inuttaasullu ilagaat inuusuttut, soorlu Sara Lyberth, Pipaluk Hammeken aamma Jens Zeeb.
Filmi festivalimik allartitsisumit, Meira Blausteinimit nersualaarneqarpoq:
Ineriartorneq pillugu oqaluttuarneqartut torrallataanersaraat kusanarnersaralugulu, qangalimi taamaattumik takuvunga. Inuttaasut misilittagaqanngikkaluarlutik kusanartorsuarnik avatangiiseqarlutik peqqissaartumik aalassannartumillu isiginnaartitsipput, taama oqaasertalerpaa.