Filippinerit peqqissaasut narrugai
Filippinerit Qeqertaanni pisariaqartitanit amerlanerusut peqqissaasutut ilinniagaqartarput aamma Nunatsinni peqqissaasut amigaataasorujussuupput.
Taamaattumik suliffeqarfik Health Care Danmark Nunatsinni Peqqinnissamut Pisortaqarfimmut decembarimi saaffiginnippoq, peqqissaasunik Filippinerit Qeqertaanneersunik Nunatsinni atorfinikkusussinnaasunik neqerooruteqarluni, neqeroorulli itigartitsissutigineqartoq, Health Care Danmarkimi pisortaq Birger Tordrup oqarpoq.
Tamanna suliffeqarfimmi pisortap tupigusuutigaa, tassami maannakkut kalaallit tusagassiorfiini peqqissaasut amigaataanerujussuat atuarneqarsinnaammat. Qaammatip tulliani peqqissaasut 200-t Filippinerit Qeqertaanneersut, Thailandimi sapaatip akunneranut nalunaaquttap akunnerini 30-ni qallunaat oqaasiinik sukumiisumik ilinniartinneqassapput. Taakkua aasaru Danmarkiliassapput napparsimmavinni suliitigalutik qallunaatut ilinniassallutik, pilersaarutillu najoqqutaralugit oktobarimi Danmarkimi napparsimmavinni atorfinitsinneqassallutik.
Taakkunannga 30-t Nunatsinni atorfinitsinneqarsinnaanissaat suliffeqarfiup Nunatsinni peqqinnissamut pisortaqarfimmut siunnersuutigigaluarpaa, oqaatigineqareersutulli itigartinneqarlutik.
Birger Tordrupip oqaatigaa peqqissaasup ataatsip oqaatsinik ilinniartinneqarnera suliffimmillu misiliinera 125.000 koruunit missaannik akeqartoq. Aaqqissuussinermilu peqqissaasut ukiuni pingasuni sulereernermikkut angerlarsinnaassasut.
Birger Tordrupip aamma oqaatigaa, peqqissaasut Filippinerit Qeqertaanneersut suliffissaaleqisut nunanit allanit maluginiarneqarluartut. 1300-t USA-mut 200-llu Canadamut siorna suliartorput.
Peqqinnissamut pisortaqarfimmit oqaaseqartitsiniaraluaratta ataatsimiittoqarnera pissutigalugu iluatsinngitsoorparput.
