Filippinerini nunap sisoornera inuit 22-t ajunaartut
Filippinerini qeqertat ilaanni Cebumi illoqarfiup Nagap eqqaani nuna sisoormat inuit 22-t ajunaarsimasut nalunaarutigineqarpoq.
Allattoq Ritzau
septembarip 21-at 2018 09:28
Nutserisoq Mads Lynge
Illorpassuit marullummit qallerneqarsimapput, inuillu 50-it tikillugit maqaasineqartut, tamaani oqartussat nalunaarutigaat.
Politiit, qatserisartut annaassiniartartullu allat 300-t missaat nunap sisoorneranit aniguisimasinnaasunik unnuaq tamaat ujaasipput.
Kiattup anorersuarujussua Mangkhut Filippinerinut sapaatip-akunnerata siuliani annguppoq, siallingaatsiarluni. Inuit 88-it Filippinerit avannarpasissuani taamanikkut ajunaarput.
Filippinerini qeqertaq Cebu takornarianit ornigarneqarluartarpoq, illoqarfillu Naga 100.000-it sinnerlugit innuttaqarluni.
