FIFAp Nunatsinni isikkamik arsaanneq tapersersorpaa
FIFA-p Dansk Boldspil Union suleqatigalugu Kalaallit Nunaanni isikkamik arsaanneq 2013-imi aamma tapersersorniarpaa. Tamanna nunatsinni sumiiffinni assigiinngitsuni isikkamik arsaannermi pikilialaartitsinerni atortunik tunissuteqarnikkut pissaaq. Meeqqat arsanik tujuuluaqqanillu tunineqassapput Nuummilu GBU ajuuffisanik mikisunik napasuliaaqqanillu tunineqassalluni.
Allattoq Peter Troelsen, Simon Uldum
marsip 21-at 2013 07:26
-Pikialaartitsinerit pingasut ukiup ingerlanerani ingerlanneqartussaapput. Taakkulu Sisimiuni, Qaanaami Upernavimmilu pissapput, aamma sungiusaasunik aqutsisunillu nunaqarfinneersunik aggersaasoqassamaarpoq, pikilialaartitsinerit imarisaa sapinngisamik amerlanerpaanut siammarneqarniassammata, Kalaallit Nunaanni Isikkamik arsaattartut Katuffianni siulittaasoq Lars Lundblad oqaluttuarpoq.
FIFA-mi maajimi 2013-imi ataatsimeersuarnissamut atatilligu peqataasut ilaasa "Goal-project"-ikkut aningaasaliissutigineqarsimasut qanoq atorneqarsimanersut takussavaat. FIFA filmiliortussanik apriilimi 2013-imi Qaqortuliartitsissamaarpoq illoqarfimmi ivigaaraasanik arsaattarfik assiliartorlugu.
