Fifamut matu suli matoqqavoq
- Pissutsit allanngortissinnaanngilakka, taamaattumillu aamma timersortartutut arsaattartutullu oqaannarsinnaavunga, aap, ajuusaarpunga, nunarsuarmi arsaattartut pissaaneqarnersaat, Fifap præsidentia Sepp Blatter ajuusaarpoq. Ajuusaarutaa tassaavoq Kalaallit Nunaata nunatut namminertut, nammineq erfalasuni atorlugu, arsaalluni Europami pissartanngorniunnernut EM-inut imaluunniit Arsaalluni nunarsuarmi pissartanngorniunnernut VM-inut ukiuni tullerni arlalissuarni peqataasinnaassanngimmat. Fifa-p præsidentiata tamanna erseqqissumik oqaatigaa, Kalaallit Nunaannut angalarngaarnermini Nuummut ullumi tikikkami.
- Fifami maleruaqqusat malillugit nuna immikkut aatsaat ilaasortanngorsinnaasarpoq, nunat tamalaat akornanni nunatut namminersuittutut akuerisaasimagaanni, nassuiaavoq.
Kisianni sooruna Savalimmiormiut arsaattartui EM-inut VM-inullu anngunniussinnaasartut, aperaarput. Aap, tassa imaappoq. Fifa-mi nunat sorliit ilaasinnaasut pillugit maleruaqqusat sukateriffigineqanngikkallarmata, Savalimmiut namminersulernikuummat ilaasortanngortinneqarsimammat. Tamannalu pisimavoq maleruaqqusat 2004-mi nutarterneqarnerat sioqqullugu.
-Tusarlugu isumaqarnarsinnaagaluarpoq Savalimmiuni arsaattartut kattuaffianni ilaasortat Fifap nunarsuarmi arsaannermi pitsaassuserisassatut piumasarisai ullumikkut atuuttut Savalimmiut naammassisinnaanngikkaat. Taamaalluarsinnaavoq, kisianni tassa maleruaqqusat sukateriffigineqannginneranni Savalimmiut ilaasortanngornikuummata anisinnissaat eqqarsaatiginngilarput, Sepp Blatter nangippoq.
Tassa imaappoq. Nuummi arsaattarfimmik ivigaaraasalimmik qulisamik illorsualiortoqaraluarpalluunniit kalaallit arsaattartui Europami nunarsuarmiluunniit tamarmi arsaannermi pissartanngorniunnernut nunatut immikkut ilaasinnaasanngikkallassapput.
Sepp Blatterip kajumissaarutigaa, arsaattarfissualiortoqassappat, arsaannerinnaanngitsumut aammali timersuutinut aamma sammisassaqartitsinernut allanut periarfissalerneqassasoq. Qulisamik arsaattarfittaarniaqatigiit sinnerlugit Kim Godtfredsen ima oqarpoq:
- Soorunami minnerpaartaa allaavigalugu uagut suliniarsimavugut, taamaammat pakatsinngeqaanga, oqarpoq nangillunilu:
- Sepp Blatterip projekterput soqutiginnilluni takumma pakatsinngilanga. Sorpassuarnik aamma, nammineq misilittakkatik aallaavigalugit sorpassuarnik siunnersuuteqarpoq, Kim Godtfredsen oqarpoq.
Siunnersuutigineqartut tunngavigalugit qulisamik ivigaaralimmik arsaattarfittaarniaqatigiit nutaamik siunnersuuteqassapput.
- Suleriaqqinnissarput pissanganarpoq, oqarpoq.
Kalaallit Nunaalli qimalinngilaa, neriuuteqalaalaalersitsigani:
- Kisiannimi ullut arlaanni piviusunngorumaarpoq, tamanna qularnanngilaq. Paasivarami Kalaallit Nunaanni namminersulivinneq angujartuaarissi, Blatter naggasiivoq.
