Fidel Castrop toqunissaa erinitsaappaat

Cubamiuusimasut USA-mi Miamimut qimarngusut Cubami præsidentip, Fidel Castro-p, toqunissaa ukiuni qulikkuutaani qilanaarlutik utaqqigaluarpaat.

Castro naamigut arlaleriarluni suliaritinnermi kingorna sanngiitsuararsuuvoq, sivisuumillu uumanissaa qularnarpoq. Taamaammat ullormi toqquviani nuannannissarsuarmut cubamiut qimarngusut piareersarnerat ilusinikkiartuaarpoq.

Nuannannissarsuarmut aaqqissuisussanik Miamimi illoqarfiup pisortai qinikkat ataatsimiititaliorsimapput. Nuannannissarsuaq Orange Bowlimi pissaaq – Orange Bowl tassaalluni amerikamiut arsaattarferujussuat.

Ullormut nuannaffiusussamut ullormut tassunga tulluarsakkanik ilaatigut tujuuluaraliortoqassaaq, pinnersaatissanik sanasoqassaaq, nipilersortussanik inniminniisoqassaaq allarpassuillu.

Orange Bowl Cubamit qimarngusunut hundretusindtilippassuarnut, Floridap kujasissuani nunaqalersimasunut, immikkorluinnaq pingaaruteqarpoq - tassami

Cubap kiffaanngissuseqalernissaa USA-mi præsidentiugaluup John F. Kennedy-p 1961-imi tassani arsaattarfissuarmi neriorsuutigaa.