Februaarip ulluisa 29-at: Nappaatit qaqutigoortut ulluat
Erna Lange Angubesen tallimanilli ukioqarami qaammatit pingasukkaarlugit nappaanni pillugu pilatsittarpoq.
- Nerisamma aqqutaatigut nerukillisoortarnera inunngoramali taanna pigisimasara. 1985-mi paaseqqaarpaat nerukinnersaqartunga taava sukkanerpaamik Danmarkimukaannikuuvaannga taassuma kingorna immaqa 1986-mi 1985-imilunniit qaammatit pingasukkaarlugit Danmarkimukartarsimavunga nerisamma aqqutaa neruttorsartikkiartorlugu.
Erna 24-nik ukiulittut inuusuttoqamminik allanik ilaqarusuttoqaaq, ilaatigut nereqatigiiutaa katerisimaarnernut. Tamakkuli kinguarsimaarfigisariaqartarpai, nerisani iisinnaajunnaraangamigit meriaqattaarnerit takutikkuteqqikkaangata.
Nakorsallu taarseraannerujussuata kinguneranik misissortinnerit suliariteqqinnissallu aaqqissuutteqqinnissaat imaaliallaannaq pisinnaaneq ajorput. Taamaammat sivisuumik iluamik nerisinnaajunnaaraangami nukillaanganerujussuaq aqqusaartariaqartarpaa pilatteqqinnissami tungaanut. Pilatsereeraangamilu inuttut nalinginnartulli inooqqissinnaanngortarpoq, qaammatialunnguani.
Erna meeqqerivimmi ikiortitut sulisarpoq siunissamilu perorsaasutut ilinniagaqarnissani angorusuppaa, aperigatsigulu inuunermini suna kissaatiginerpaajuneraa ima akivoq:
- Kissaatiginerpaassagaluarpara nakorsap neriorsuutiginikuusaraluattut aaqqinneqarsinnaanissaa siunissara eqqarsaatigalugu aamma taamannak inuujuassanerlunga, Erna Lange Angubesen oqaluttuarpoq.
