FC Nanoq isertitseriaqattaarnermi unammeqataalerpoq

FC Nanup holdit marluk Dansk Boldspils-Unionip Danmarkimi isertitseriaqattaarluni unammersuartitsinissaanut ’VM i Straffespark”-imut peqataatinniarpai, unamminermi tassani isertitsiseriaqattaarneq kisimi ingerlanneqassaaq.

Unammissutaasussarlu ajornanngitsuararsuussaaq: Holdit marluk imminnut isertitsivigeriaqattaarlutik unammissapput, soorlu VM-imi Brasiliami ingerlanneqartumi arlaleriarluta takusariikkatsitut.

FC Nanup holdit marluk aallartitassai unammersuarnermut, Københavnimi Fælledparkenimi ingerlanneqartussamut, arfiningorpat ullaap tungaani quliniit peqataassapput.

- Neriuppugut nuannaarlutik FC Nanumut illersuiartortunik, FC Nanullu unamminerani tamarmi tapersuisunik takujumaarluta, FC Nanumeersoq, Mads Mathiassen, oqarpoq.

FC Nanoq finalimut anngutissappat, finalip arfininngornerup unnukkuani nalunaaqutaq arfineq marlup arfineq pingasullu missaani ingerlanneqarnissaa naatsorsuutigineqarpoq.

VM-imi unammersuavinneq Brasiliami ingerlanneqartoq ullumikkut nanginneqassaaq, tassa Brasilia aamma Tyskland unammissammata.

Unamminerat KNR2-kkut nalunaaqutaq 17.50-imiit malinnaavigineqarsinnaavoq.