Faxe Kondip tujuuluarai atortalissavaat
Kalaallit Nunaanni assammik arsartartut Kattuffiat immiorfimmik Royal Unibrew-imik aningaasatigut tapersersortiginissaanik nutaamik isumaqatigiissuteqarsimavoq. Nunarput sinnerlugu arnat assammik arsartartut, tamatuma kinguneranik, Faxe Kondip tujuuluaraanik atorlutik siunissami unammisalissapput.
Aningaasanik tapersersuinissamik isumaqatigiissutip kinguneranik, U18-ip aamma U20-p unamminermi atisaani, sungiusarnermilu atisani, Faxe Kondi takuneqarsinnaassaaq. Tamatumunnga akiliutitut Unibrew ukiut tamaasa aningaasaliisassaaq, aamma arnat nunarsuaq tamakkerlugu pissartanngorniunnissami 2008-mi anngutissappata immikkut aningaasaliisoqassaaq.
- Qularinngilarput taamatut aningaasatigut tapersersuineq tamatsinnut nuannaarutaassasoq – tamanna ilaatigut pissuteqarpoq kalaallit angutit assammik arsartartut nunarsuaq tamakkerlugu pissartanngorniunnermut qanittukkut anngunnermikkut, Kalaallit Nunaat, nunatsinnilu assammik arsartarneq, pitsaasumik takkorliummassuk, Jørgen-Anker Ipsen, immiorfimmit Royal Unibrew-imeersoq, tusagassiorfinnut nalunaarummini ilaatigut allappoq.
Nunatsinni assammik arsartartut Kattuffianni siulittaasup, Palle Jerimiassenip, aammattaaq aningaasatigut tapersersuineq naammagisimaarpaa, oqarlunilu, nunatsinni assammik arsartarnerup nunarsuarmiunut anngukkiartuaarnerani taamaattunik suleqateqarnissamik pisariaqartitsisoqartoq.
