Fatuma Ali: Suleqatigiinnerliorneq soraarninnut pissutaaqataavoq
Dronning Ingridip napparsimmavissuani eqqarsartaatsikkut napparsimasunut immikkoortortami A1-imi massakkut pisortaanerusumut ilungersunartunik suleqatigiinnermik ajornartorsiuteqarneq pissutigalugit, eqqarsartaatsikkut nappaatinut nakorsaq Fatuma Ali, nunatsinni eqqarsartaatsikkut katsorsaanermi ukiuni qulingiluani maligassiuilluni sulereerluni juulimi tunuarpoq.
Eqqarsartaatsikkut nappaatinut nakorsaq maanna Danmarkimi Åbenråmi nakorsaanertut sulisoq, taama AG-mut ullumi saqqummersumut ilisimatitsivoq.
Fatuma Ali siunnersortitut atorfeqaraluarpoq, A1-imi nakorsaanerit pisortaattut nammineerluni tunuarnermi kingornagut. Siunnersortitut atorfimmit soraarnerminut pissutaasoq siusinnerusukkut oqaatiginikuunngilaa.
- Paasissutissat pisariaqartut pineq ajorpakka. Nakorsaanerup aqutsisuusup saaffiginnissutikka akissuteqarfigineq ajorpai. Aamma taama pisoqarpoq eqqarsartaatsikkut nappaatinut nakorsat sinerissameersut ataatsimoorlutik saaffiginnimmata. Ilisimasat immikkut ittut taama amerlatigisut annaaginnarneqarnissaat inuiaqatigiinnut iluaqutaanavianngilluinnarpoq, Fatuma Ali AG-mut oqarpoq.
Taamatut avammut oqaaseqarpoq isumaginninnermi siunnersortit pisortaat Astrid Hansen Hard qanittukkut KNR-ikkut katsorsaanermi pissutsit isornartorsioreeraalu.
Fatuma Ali illuatungilerlugu Dronning Ingridip Napparsimmavissuani pisortaanerit eqqarsartaatsikkut katsorsaavimmi maanna pisortaasoq tapersersorpaat. Tamanna takuneqarsinnaavoq tusagassiuutinut nalunaarutaanni, tassani oqaatigineqarluni immikkoortortami ukiuni arlalinni toqqissisimanngittoqartoq, peqqissaasutut atorfiit inuttaqanngitsut ullormannalu tikillugu inuttalerneqanngitsut pissutigalugit.
- Uggornarpoq siusinnerusukkut pisortaasimasut, massakkut pisortaasut tunngavissaqanngitsumik tusagasiuutitigut isornartorsiormatigik. Tamakkua pitsaasumik aaqqiinermik kinguneqarnavianngillat, napparsimmavissuup pisortaanera Jens Møller Jensen allappoq.
Peqqissutsimut naalakkersuisup Agathe Fontainip naalakkersuisoqarfini qinnuiginikuuaa Dronning Ingridip napparsimmavissua suleqatigalugu immikkoortortami A1-imi ajornartorsiutit aaqqiissutissaannik nassaarniaqqullugit.
